काठमाडौँ । वारेन बफेटको कम्पनी बर्कशायर ह्याथवेले चिनियाँ अटो निर्माता बीवाईडीबाट आफ्नो लगानी पूर्ण रूपमा फिर्ता लिएको छ । एक फाइलिङ अनुसार यो १७ वर्ष लामो लगानी अवधिमा कम्पनीको मूल्य २० गुणाभन्दा धेरैले बढेको थियो ।
बर्कशायरको ऊर्जा सहायक कम्पनीले गरेको फाइलिङमा मार्चको अन्त्यसम्ममा बीवाईडीमा रहेको उसको लगानीको मूल्य शून्य देखाइएको छ, जुन २०२४ को अन्त्यमा ४१ करोड ५० लाख अमेरिकी डलर रहेको थियो ।
बफेटको कम्पनीले सन् २००८ मा शेन्जेनमा आधारित बीवाईडीमा लगानी सुरु गरेको थियो । त्यस बेला कम्पनीले २३ करोड अमेरिकी डलरमा लगभग २२ करोड ५० लाख शेयर खरिद गरेको थियो । जुन त्यति बेलाको १० प्रतिशत हिस्सा बराबर थियो ।
बीवाईडीको शेयर मूल्य २० गुणाभन्दा बढीले बढेपछि बर्कशायरले सन् २०२२ मा ती शेयरहरू बेच्न थालेको थियो । यस विषयमा बीवाईडीको ब्रान्डिङ र जनसम्पर्कका महाप्रबन्धक ली युनफेईले आफ्नो आधिकारिक वइबो अकाउन्टमा एक पोस्टमार्फत बर्कशायरलाई ‘विगत १७ वर्षको लगानी, सहयोग र साथ’ का लागि धन्यवाद दिएका छन् । उनले यो शेयर बिक्रीलाई ‘सामान्य’ स्टक लगानी व्यापारको रूपमा चर्चा गरेका छन् ।
अमेरिकी अटो निर्माता टेस्लाको सबैभन्दा ठुलो प्रतिस्पर्धी मानिने बीवाईडीले साढे तीन वर्षमा पहिलो पटक त्रैमासिक नाफामा गिरावट भोगेको छ । यो गिरावट मूल्य युद्धविरुद्ध सरकारी अभियान चलिरहेको बेला कम्पनीको विस्तारमा धक्का पुगेको समयमा आएको हो ।
कम्पनीको विश्वव्यापी ढुवानीको लगभग ८० प्रतिशत हिस्सा ओगट्ने घरेलु बिक्री अगस्टमा लगातार चौथो महिना पनि घट्यो । यसै कारण बीवाईडीले आफ्नो वार्षिक बिक्री लक्ष्य १६ प्रतिशतसम्म घटाएर ४६ लाख सवारी साधनमा झारेको छ ।
बर्कशायरले सोमबार यस विषयमा तत्काल कुनै प्रतिक्रिया दिको छैन । सीएनबीसीले आइतबार पहिलो पटक बर्कशायर आफ्नो हिस्सेदारीबाट बाहिरिएको समाचार प्रकाशित गरेको थियो ।
पछिल्लो अध्यावधिक: असोज ६, २०८२ २०:२०
